பத்திரிக்கை அறிக்கை
இந்தியாவின் உருவாக்கம் மற்றும் வளர்ச்சியில் இஸ்லாம் மற்றும் முஸ்லிம....
பத்திரிக்கை செய்தி..
03 ஜனவரி 2026
வெனிசுலா மீதான அமெரிக்க இராணுவ நடவடிக்கைக்கு ஜமாஅத்தே இஸ்லாமி ஹிந்த் தலைவர் சையத் சஆததுல்லாஹ் ஹுசைனி அவர்கள் கடும் கண்டனம்
இது இறையாண்மை மற்றும் சர்வதேச சட்டத்தை மீறும் செயல் என சாடல்.
புது தில்லி:
வெனிசுலா மீது அமெரிக்கா மேற்கொண்டுள்ள சமீபத்திய இராணுவ நடவடிக்கையை ஜமாஅத்தே இஸ்லாமி ஹிந்த் (JIH) தலைவர் சையத் சஆததுல்லாஹ் ஹுசைனி வன்மையாகக் கண்டித்துள்ளார்.
இது ஒரு நாட்டின் இறையாண்மை,
சர்வதேச சட்டம் மற்றும் உலகளாவிய அமைதியை சீர்குலைக்கும் ஆபத்தான ஆக்கிரமிப்பு நடவடிக்கை என்று அவர் விவரித்துள்ளார்.
இது தொடர்பாக ஊடகங்களுக்கு அவர் அளித்துள்ள அறிக்கையில் கூறியிருப்பதாவது:
"வெனிசுலா மீது நடத்தப்பட்ட இராணுவத் தாக்குதல்களும், அந்நாட்டின் அதிபர் நிக்கோலஸ் மதுரோ கைது செய்யப்பட்டு, வலுக்கட்டாயமாக அமெரிக்காவிற்கு நாடு கடத்தப்பட்டிருப்பதும் ஐக்கிய நாடுகள் சபையின் சாசனம் மற்றும் சுதந்திர நாடுகளுக்கு இடையிலான உறவுகளை நிர்வகிக்கும் அடிப்படை விழுமியங்களை வெளிப்படையாக மீறும் செயலாகும்.
ஐநா பாதுகாப்பு சபையின் அனுமதி இல்லாமலோ அல்லது தற்காப்புக்கான தெளிவான காரணங்கள் இல்லாமலோ பலப்பிரயோகம் செய்வது ஒரு ஆபத்தான முன்னுதாரணத்தை உருவாக்குகிறது.
இது ஒருதலைப்பட்சமான இராணுவத் தலையீடுகளை இயல்பாக்க வழிவகுக்கும்.
இத்தகைய நடவடிக்கைகள் சர்வதேச ஒழுங்கை பலவீனப்படுத்துவதோடு, சிறிய மற்றும் பலவீனமான நாடுகள் சக்திவாய்ந்த நாடுகளின் கட்டாயத்திற்கு ஆளாகும் சூழலை ஏற்படுத்துகிறது."
சுமார் 300 பில்லியன் பேரல்கள் என மதிப்பிடப்பட்டுள்ள வெனிசுலாவின் பிரம்மாண்டமான எண்ணெய் வளத்தை குறிவைத்தே இந்த நடவடிக்கை எடுக்கப்பட்டுள்ளதாக சையத் சஆதாத்துல்லாஹ் ஹுசைனி
சுட்டிக்காட்டினார்.
அமெரிக்க டாலருக்குப் பதிலாக மற்ற நாணயங்களில் எண்ணெய் வர்த்தகம் செய்ய வெனிசுலா எடுத்த முயற்சிகள், அமெரிக்காவின் பொருளாதார ஆதிக்கத்திற்கு விடுக்கப்பட்ட சவாலாகக் கருதப்பட்டதே தற்போதைய மோதலுக்கு முக்கியக் காரணம் என்றும் அவர் தெரிவித்தார்.
குற்றச்சாட்டுகளையோ அல்லது அரசியல் கருத்து வேறுபாடுகளையோ ஒரு நாட்டின் மீது இராணுவப் படையெடுப்பு நடத்துவதற்கோ அல்லது ஆட்சி மாற்றத்தை ஏற்படுத்துவதற்கோ ஒரு சாக்காகப் பயன்படுத்த முடியாது என்று அவர் குறிப்பிட்டார்.
இந்த நடவடிக்கை ஒரு 'நவீன ஏகாதிபத்திய' (Neo-imperialism) செயல் என்றும், இது வெனிசுலாவை மட்டுமல்லாமல் ஒட்டுமொத்த லத்தீன் அமெரிக்க பிராந்தியத்தையும் சீர்குலைக்கும் அபாயத்தைக் கொண்டுள்ளது என்றும் அவர் எச்சரித்தார்.
இத்தகைய தலையீடுகள் அமைதியையோ நீதியையோ நிலைநாட்டுவதற்குப் பதிலாக, நீண்டகால அமைதியின்மை, பொதுமக்கள் துயரம் மற்றும் ஜனநாயக நிறுவனங்களின் வீழ்ச்சிக்கே வழிவகுக்கும் என்பதை வரலாறு மீண்டும் மீண்டும் நிரூபித்துள்ளதாக அவர் கூறினார்.
சக்திவாய்ந்த நாடுகளின் இத்தகைய ஒருதலைப்பட்ச இராணுவ நடவடிக்கைகள், ஐநா சாசனத்தின் அடிப்படையிலான சர்வதேச அமைப்பை படிப்படியாக சிதைத்து வருவதாக அவர் கவலை தெரிவித்தார்.
ஐநா பாதுகாப்பு சபையின் அவசரக் கூட்டத்தைக் கூட்டப் பல நாடுகள் விடுத்துள்ள கோரிக்கையை வரவேற்ற அவர்,
மேலும் பதற்றம் அதிகரிப்பதைத் தடுக்கவும், சர்வதேச சட்ட மீறல்களுக்குப் பொறுப்பேற்கச் செய்யவும் சர்வதேச அளவில் அழுத்தம் கொடுக்கப்பட வேண்டும் என்றார். எந்தவொரு நாட்டின் எதிர்காலத்தையும் அந்நாட்டு மக்களே தீர்மானிக்க வேண்டும் என்றும், வெனிசுலாவின் இறையாண்மை மற்றும் சுயநிர்ணய உரிமையை மதிப்பதே அவசியம் என்றும் அவர் வலியுறுத்தினார்.
அமெரிக்காவின் இந்த இராணுவ ஆக்கிரமிப்பை இந்தியா பகிரங்கமாக எதிர்க்க வேண்டும் என்றும், பேச்சுவார்த்தை மற்றும் சர்வதேச அமைப்புகள் மூலம் மோதல்களுக்கு அமைதித் தீர்வு காண இந்தியா குரல் கொடுக்க வேண்டும் என்றும் ஜமாஅத் தலைவர் கேட்டுக்கொண்டார்.
இறுதியாக அவர் கூறுகையில், "அரசியல் முடிவுகளைத் திணிக்க ஏகாதிபத்திய ஆக்கிரமிப்புகள் மற்றும் பலப்பிரயோகம் செய்யப்படுவதை ஜமாஅத்தே இஸ்லாமி ஹிந்த் உறுதியாக எதிர்க்கிறது.
ஒரு நியாயமான மற்றும் நிலையான உலக ஒழுங்கிற்கு இறையாண்மையை மதித்தல், சர்வதேச சட்டத்தைப் பின்பற்றுதல் மற்றும் அமைதிக்கான அர்ப்பணிப்பு ஆகியவை மிக அவசியமானவை.
இத்தகைய செயல்களைக் கண்டும் காணாமல் இருப்பது மேலும் பல விதிமீறல்களுக்கே ஊக்கமளிக்கும் என்றார்.
வெளியீடு:
சல்மான் அஹ்மத்
தேசிய செயலாளர்,
ஊடகத் துறை,
ஜமாஅத்தே இஸ்லாமி ஹிந்த்,
புது தில்லி.
