பத்திரிக்கை அறிக்கை
இந்தியாவின் உருவாக்கம் மற்றும் வளர்ச்சியில் இஸ்லாம் மற்றும் முஸ்லிம....
2026-ஆம் ஆண்டை "அனைவருக்குமான நீதி, அமைதி, ஒற்றுமை மற்றும் உள்ளடக்கிய நிலையான வளர்ச்சிக்கான ஆண்டாக" ஜமாஅத்தே இஸ்லாமி ஹிந்த் அறிவிப்பு
புது தில்லி:
ஜமாஅத்தே இஸ்லாமி ஹிந்த் (JIH) அமைப்பு ஜனவரி 03, 2026 அன்று செய்தியாளர் சந்திப்பு ஒன்றை நடத்தியது.
இதில் அதிகரித்து வரும் மதவாத துருவமுனைப்பு, ஏழை எளியோரின் குளிர்கால துயரங்கள் மற்றும் மத, பிராந்திய சிறுபான்மையினருக்கு எதிராக நடத்தப்படும் திட்டமிட்ட வன்முறைகள் குறித்து தனது ஆழ்ந்த கவலைகளை அந்த அமைப்பு பதிவு செய்தது.
செய்தியாளர்களிடம் பேசிய ஜமாஅத்தே இஸ்லாமி ஹிந்தின் துணைத் தலைவர் பேராசிரியர் சலீம் இன்ஜினியர் அவர்கள்
இந்தியா எப்போதும் பன்முகத்தன்மை மற்றும் மத நல்லிணக்கத்தின் செழுமையான பாரம்பரியத்தைக் கொண்ட ஆழமான ஆன்மீக நாடு என்று குறிப்பிட்டார்.
"பொதுவாக, நமது மதத் தலைவர்களும் நிறுவனங்களும் பன்முகத்தன்மையில் ஒற்றுமையை வளர்ப்பதில் முக்கியப் பங்காற்றியுள்ளனர்.
இருப்பினும், இந்த பாரம்பரியம் தற்போது அச்சுறுத்தலுக்கு உள்ளாகியுள்ளது," என்று அவர் கூறினார்.
மதவாதப் பேச்சுக்கள், இஸ்லாமோபோபியா (இஸ்லாமிய வெறுப்பு), வெறுப்புப் பேச்சுகள், கும்பல் கொலைகள் மற்றும் மதப் பாகுபாடுகள் அதிகரித்து வருவது குறித்து அவர் தனது ஆழ்ந்த கவலையை வெளிப்படுத்தினார்.
தெற்காசிய நீதி பிரச்சாரத்தின் (South Asia Justice Campaign) '2025-ஆம் ஆண்டு இந்திய துன்புறுத்தல் கண்காணிப்பு' அறிக்கையை மேற்கோள் காட்டிப் பேசிய பேராசிரியர் சலீம் அவர்கள், "முக்கியமாக முஸ்லிம்கள் உள்ளிட்ட மதச் சிறுபான்மையினருக்கு எதிரான அரசு மற்றும் அரசு சாரா அமைப்புகளின் அத்துமீறல்கள் கடுமையாக அதிகரித்துள்ளன" என்று தெரிவித்தார்.
இதில் நீதிமன்றத்திற்கு அப்பாற்பட்ட கொலைகள், கும்பல் வன்முறை, தன்னிச்சையான கைதுகள், தண்டனை நடவடிக்கையாக வீடுகள் இடிக்கப்படுவது, கட்டுக்கடங்காத வெறுப்புப் பேச்சுகள் மற்றும் கட்டாய நாடு கடத்தல்கள் ஆகியவை அடங்கும் என அவர் குறிப்பிட்டார்.
ஒரு பெரிய பயங்கரவாதச் சம்பவத்திற்குப் பிறகு இத்தகைய போக்குகள் தீவிரமடைந்ததாகவும், பசு பாதுகாப்பு மற்றும் பாதுகாப்பு அச்சுறுத்தல்கள் என்ற போர்வையில் வெகுஜன கைதுகள் மற்றும் கிளர்ச்சி எதிர்ப்பு நடவடிக்கைகளில் ஆதிவாசிகளுக்கு இடையே அதிக உயிரிழப்புகள் ஏற்பட்டதாகவும் அவர் சுட்டிக்காட்டினார்.
"சில சக்திகள் மத ரீதியான துருவமுனைப்பை ஏற்படுத்தி, சமூகங்களிடையே பிளவை உருவாக்கி, அரசியலுக்காக மதத்தைத் தவறாகப் பயன்படுத்துவதை மறுக்க முடியாது," என்று கூறிய அவர், அதே சமயம் சமூகத்தின் நன்னெறி வலிமையின் மீது நம்பிக்கை தெரிவித்து, "இந்திய மக்கள் நம் நாட்டில் உள்ள வகுப்புவாத சக்திகளை முறியடிப்பதற்கான வலிமையையும் ஞானத்தையும் பெற்றுள்ளனர் என்று நாங்கள் உணருகிறோம்," என்றார்.
ஜமாஅத்தே இஸ்லாமி ஹிந்த் 'தார்மிக் ஜன் மோர்ச்சா' மற்றும் 'சத்பாவ்னா மஞ்ச்' போன்ற மதங்களுக்கு இடையேயான அமைதி முன்னெடுப்புகள் மூலம் அயராது உழைத்து வருவதாக அவர் குறிப்பிட்டார்.
"இந்தத் தளங்கள் மக்கள் ஒன்றிணைந்து உரையாடவும், ஒருவரை ஒருவர் புரிந்து கொள்ளவும், ஒற்றுமையின் பாலங்களை உருவாக்கவும் கருவியாக உள்ளன," என்று அவர் கூறினார்.
இந்த முயற்சிகளை வலுப்படுத்தும் விதமாக, 2026-ஆம் ஆண்டை "அனைவருக்குமான நீதி, அமைதி, ஒற்றுமை மற்றும் உள்ளடக்கிய நிலையான வளர்ச்சி ஆண்டாக" ஜமாஅத்தே இஸ்லாமி ஹிந்த் தீர்மானித்துள்ளதாக அறிவித்தார்.
குளிர்காலத் துயரங்கள் குறித்துப் பேசிய ஜமாஅத்தே இஸ்லாமி ஹிந்தின் மற்றொரு துணைத் தலைவர் மாலிக் முஹ்தசிம் கான் அவர்கள், வட மற்றும் கிழக்கு இந்தியா முழுவதும் கடும் குளிரால் பாதிக்கப்பட்டுள்ள ஏழைகள் மற்றும் வீடற்றவர்களுக்குப் போர்வை விநியோகம் செய்யும் பணிகளில் ஜமாஅத்தே இஸ்லாமி ஹிந்த் ஈடுபட்டுள்ளதாகத் தெரிவித்தார்.
"மதம், சாதி அல்லது பின்னணி பாராமல் தேவையுள்ள அனைவருக்கும் போர்வைகள் வழங்கப்படுகின்றன," என்றார் அவர்.
இரவு நேர விடுதிகளை விரிவுபடுத்துதல், சூடான உணவுகள் வழங்குதல் மற்றும் நடமாடும் மருத்துவக் குழுக்களை அமைத்தல் போன்ற ஆக்கப்பூர்வமான நடவடிக்கைகளை மத்திய அரசு எடுக்க வேண்டும் என்று அவர் வலியுறுத்தினார். மேலும், குடிமக்கள் தங்கள் பங்களிப்பை வழங்குமாறும் அவர் வேண்டுகோள் விடுத்தார்.
கிறிஸ்தவ சமூகத்தினருக்கு எதிராக அதிகரித்து வரும் வன்முறை மற்றும் துன்புறுத்தல்கள் குறித்தும் மாலிக் மோதாசிம் கான் கவலை தெரிவித்தார்.
"இந்த நெருக்கடியான நேரத்தில் நாங்கள் கிறிஸ்தவ சமூகத்துடன் உறுதுணையாக நிற்கிறோம்," என்று அவர் கூறினார். மேலும், திரிபுராவைச் சேர்ந்த எம்பிஏ மாணவர் அஞ்சல் சக்மா அடித்துக் கொல்லப்பட்ட கொடூர சம்பவத்தை அவர் வன்மையாகக் கண்டித்தார். "இது இனவெறியால் தூண்டப்பட்ட ஒரு வெறுப்புக் குற்றம்.
வடகிழக்கு இந்திய மக்கள் மீதான தொடர்ச்சியான பாகுபாட்டின் விளைவே இது," என்று அவர் கூறினார்.
இறுதியாக, வெறுப்பு சார்ந்த வன்முறைகளுக்கு எதிராக ஒரு விரிவான தேசியச் சட்டத்தை இந்தியா உடனடியாக இயற்ற வேண்டும் என்று வலியுறுத்திய அவர், "எந்த ஒரு மனிதனும் மற்றொருவரை விட உயர்ந்தவன் அல்ல;
இறையச்சம் மற்றும் நற்பண்புகளே ஒருவரை உயர்த்தும்" என்ற நபிகள் நாயகத்தின் பொன்மொழியை நினைவு கூர்ந்து,
உலகளாவிய கண்ணியத்தையும் சமத்துவத்தையும் உறுதிப்படுத்த
அழைப்பு விடுத்தார்.
வெளியீடு:
ஸல்மான் அஹ்மத்,
தேசியச் ஊடகச் செயலாளர்,
ஜமாஅத்தே இஸ்லாமி ஹிந்த்,
புது தில்லி.
